СЕРБИЯ – На нєдзелю, 2. априла, у Сербиї буду виберанки за предсидателя держави, а за функцию предсидателя Републики Сербиї змагаю ше 11 кандидати, чий рядошлїд на гласацким лїстку Републична виберанкова комисия (РВК) 17. марца утвердзела зоз жребом.
Кандидати на виберацким лїстку утвердзени по шлїдуюцим шоре: САША ЯНКОВИЧ, Ґрупа гражданох (ҐГ) „За Сербию без страху”; ВУК ЄРЕМИЧ, ҐГ „Мушиме лєпше”; МИРОСЛАВ ПАРОВИЧ, Народни слободарски рух; САША РАДУЛОВИЧ, ҐГ „Досц було”; ЛУКА МАКСИМОВИЧ ҐГ „Любиша Прелетачевич Били-Лєм моцно”; АЛЕКСАНДАР ВУЧИЧ, Коалиция Александар Вучич-Сербска напредна странка, Социялистична партия Сербиї-Ивица Дачич, Социялдемократска партия Сербиї- Расим Ляїч, Єдинствена Сербия-Драґан Маркович Палма, Партия зєдинєних пензионерох Сербиї-Милан Кркобабич, Рух социялистох-Александар Вулин, Сербски рух обнови-Вук Драшковвич, Рух моц Сербиї-Боґолюб Карич, Союз войводянских Мадярох-Иштван Пастор; БОШКО ОБРАДОВИЧ, Сербски рух Двери; др ВОЇСЛАВ ШЕШЕЛЬ, Сербска радикална странка; проф. др АЛЕКСАНДАР ПОПОВИЧ, Демократска странка Сербиї; МИЛАН СТАМАТОВИЧ, ҐГ „За здраву Сербию” и НЕНАД ЧАНАК, Лиґа социялдемократох Войводини.
Як утвердзела РВК, гласацке право на предсидательних виберанкох маю 6 милиони 724 172 гражданє Републики Сербиї, а годни гласац на 8 253 виберацких местох, хтори 2. априла буду отворени од 7 до 20 годзин.
Гласацки лїстки видруковани у вецей язичних вариянтох, зависно од числа язикох хтори у службеним хаснованю на подручу одредзеней локалней самоуправи.
Попри з важацу особну леґитимацию, вибераче можу гласац и з пасошом, лєбо вожацку дозволу – з документами на хторих єст єдинствене матичне число граждана. Ткв. „стара” особна леґитимация, хторей вицекол час, на гласаню важи лєм вєдно з потвердзеньом з МУП-у же порушани поступок за єй предлуженє.
На гласанє добре вжац и обвисценє о виберацким месце хторе гражданє достали на хижну адресу, насампредз пре швидше евидентованє гласача, алє є нє обовязне.
Предвиберанкова цихосц пред виберанками за предсидателя Сербиї почина на ютре, штварток 30. марца на пол ноци, а тирва по заверанє гласацких местох. У тим чаше ше нє шме промововац кандидатох, лєбо шпекуловац о резултатох, а дошлєбодзени афирмативни активносци, як цо то поволованє гражданох же би вишли на виберанки, информованє о виходносци и сервисни информациї о виберанковим процесу.