НОВИ САД – На Трецей програми радия Радио-телевизиї Войводини на програми по руски ютре, на нєдзелю, 16. авґуста, на 7 годзин рано годно послухац Емисию за валал, а на 12:30 г емисию Културна панорама.
Ютре, на нєдзелю у найновшим виданю Емисиї за валал будзе слова о актуалносцох зоз польопривреди. Добродзечне огньогасне дружтво зоз Руского Керестура гашело огнї на Делиблатскей писковини. Пре високи температури дзивина у хотаре нє ма води, а у заєднїцкей акциї коцурских ловарох и огньогасцох наполнєти поїска з воду. У Руским Керестуре ше зберало амбалажу од пестицидох, а шлїдуюцого викенду ґастрономско-културна манифестация Днї керестурскей паприґи. У емисиї ше нє вихаби анї найновши висти зоз польопривреди, проґнозу хвилї за наиходзаци тидзень, як и цени польопривредних продуктох на новосадских пияцох.
Емисия за валал на програми кажду нєдзелю на 7 годзин рано и репризно стреду на 21:30 годзин, на УКТ габох радия РТВ на 92, 100 и 107,1 мгг, а мож ю послухац и на одложеним слуханю на сайту Радио-телевизиї Войводини. Емисию пририхтую Єлена Дудаш, Златко Колєсар, Михаил Рамач.
Потим, на 12:30 годзин у найновшей емисиї Културна панорама годно послухац звити зоз двох штиродньових стретнуцох за младих котри отримани у Руским Керестуре и у Новим Орахове. Тиж, у емисиї буду емитовани и звити зоз нащиви представительох ОЕБС у НВУ Руске слово и звит зоз схадзки Координацийного цела за запровадзованє Акцийного плану за витворйованє правох националних меншинох.
Редакторка и водителька емисиї: Саня Дивлякович. Емисию Културна панорама ше емитує кажду нєдзелю на 12:30 г и репризно на 23:00 г, а мож ю послухац на УКТ габох радия РТВ на 92, 100 и 107,1 мгг, и на одложеним слуханю на сайту Радио-телевизиї Войводини.
