НОВИ САД – У Грекокатолїцкей конкатедрали святих апостолох Петра и Павла, вчера, 14. авґуста на раншей Служби Божей означене нєзаповедане швето старозавитних Макавейских мученїкох (седем братох и їх мацери хтори дали живот за виру до правдивого Бога) – Маковея, и пошвецена вода.
Службу Божу служел парох о. Дарко Рац, дзияковали Милош Субиточ и Антония Рац.
По служби парох пошвецел воду хтору принєсли ґаздинї з дому у канчовох прикрашених зоз швижим квецом.
Маковейску воду ше одноши дому и хаснує за рижни потреби души и цела.
На недзелю, 16. авґуста Служби Божо буду на 9 и на 18 годзин. На швето Преображенє Господнє, хторе на стреду 19. авґуста, Служби Божо буду на 9 и на 18 годзин, а у раншей служби ше пошвеци овоц.