ВЕРБАС – Всоботу, 3. юния, у велькей сали Културно-просвитного дружтва (КПД) „Карпати“ у Вербаше отримани рочни концерт секцийох Дружтва, на хтори аматере представели вибор з програми хтору рихтали през цали рок, а специялни госци на концерту були два ансамбли з України.
Фолклорна секция одтанцовала хореоґрафию „Жито”, хтору обдумал Славко Микитишин, а українска шпивацка ґрупа и руска шпивацка ґрупа, з музичним провадзеньом Миколу Чизмара, одшпивали вецей композициї, як и млади шпивацки дует Аґота Ковач и Кристина Будимски.
После домашнїх наступели госци з Ужгороду, з України – два музични триа „Рапсодия“ и „Мелодия“, хтори виведли популарни традицийнални шпиванки на сучаснєйши способ и позберали симпатиї публики. Руководителька обидвох ансамблох Олеся Дубенко.
У орґанизациї КПД „Карпати“, госци з України пред концертом нащивели салаш члена Дружтва Славка Барановского, дзе ше дружели з домашнїма, а друженє предлужене и после концерту у просторийох Дружтва.