СЕРБИЯ – Министер польопривреди Сербиї Бранислав Недимович виявел же нєодлуга буду познати мири помоци польопривреднїком за чкоду хтора настала пре сушу.
Недимович за РТС гварел же закончене оценьованє чкоди од суши, як и же пре ню нєт причини за подрагшенє польопривредних продуктох.
– Маме проблем зоз сою, хтору будземе увожиц, понеже за домашнї потреби нєт досц квалитетней сої. Кукурици єст за домашнї потреби, а будзе и за вивоз. Кед слово о других польодїлских, заградкарских и овоцарских културох, шицкого будзе досц за домашнї потреби, та и за вивоз. Нє обчекуєме нїяки пременки на тарґовищу – гварел ресорни министер.
Министер додал же пририхтани два файти мирох помоци парастом – общого типу – за шицких парастох и унапрямени – за парастох чия продукция пре сушу найочкодованша.
– Мири помоци буду єдинствени и конзистентни, алє нїхто нє може обчековац же би му держава компензовала цалосни утрати. Найважнєйше же би єшеньска шатва була поробена як треба, чому допринєшу и терашнї дижджи – гварел Недимович
Министер польопривреди Недимович виявел вчера и же Сербия сполнєла шицки условия акредитованя за приступни фонди ЕУ за рурални розвой – ИПАРД, и же обчекує же до конца рока будзе розписана перша поволанка за средства з ИПАРД фондох.
– У новембру приходзи инспекция. Ми зробели шицко цо зме мали и обчекуєме позитивну оцену и першу поволанку за ИПАРД у першим тижню децембра – гварел Недимович