Новак

автор александар саванович
760 Опатрене

Пред даскельома днями, после финалного меча Шветового першенства у фодбалу и финала у Вимблдону, пита ше ми приятель за кого сом навиял. Гварим му – за Дьоковича. Знам же чекал одвит вязани за фодбал. Мой одвит бул дипломатично одмерани, алє и щири, бо праве Новак Дьокович и його приклад указали кельо тото дружтво затроване зоз мержню и нєможлївосцу же би ше на спортски успихи довчерайших сушедох зоз заєднїцкей держави патрело без политичней и шовинистичней примеси.

Праве побиднїкови Вимблдона тот успих бул перши после двох рокох, а бул „герой нациї” док победзовал. Дьокович после двох остатнїх рокох цаганя по найгоршим блаце од истих тих котри го донєдвна воздвиговали по нєбо, пришол до ситуациї же виява потримовки своїм спортским приятельом зоз репрезентациї Горватскей, при часци зоз мержню обшеднутей явносци дзе доминую политични предняки, була оценєна як зрада на найвисшим уровню. Так ше наш нєспорни шампион и єден з найлєпших амбасадорох Сербиї у швеце Новак Дьокович нашол на вдереню „патриотох”, котри у горватским народу видза лєм „усташох”, а у бошняцким – „балийох”. Вони Новака наволали нє лєм же є зраднїк, алє и з вельо горшима словами, цо ми воспитанє нє допущує же бим их цитирал. 

Парадоксално, алє исти тоти шовинисти внєдзелю мали двойнїсту причину за славенє. Бо, гоч є „зраднїк”, вон заш лєм освоєл Вимблдон, а Горвати страцели финали меч зоз Французами. Шицки щешлїви, поведло би ше.

Медзитим, тоти збуваня указую на тото кельо тот наш реґион инфиковани и затровани зоз мержню и кельо политични елити забрудзели медзиетнїчни одношеня. Будзме щири, дзепоєдни вияви зоз табору „коцкастих” солєли стари рани зраженьох у Горватскей котри ше закончели зоз вельким зменшаньом сербскей популациї у тей держави, а котри ше у Сербиї означую зоз комеморациями, а у Горватскей славя як найвекши национални швета. И то вєдно зоз гедлайнером преслави у Заґребе Марка Перковича Томпсона. То було досц тим з того боку гранїци, котри твердза же кажде хто навиял за Горватску репрезентацию – „кретен и хори”. 

А коментатором з державней телевизиї, котрим под час преносу вибегла даяка емоцийка пре ґол, або добри поцаг горватскей репрезентациї, зауважене и з боку першого чловека Сербиї котри забул же є предсидатель и тим людзом котри ше вияшнюю як Горвати, а жию у Сербиї.

На щесце, людзе як Новак Дьокович тиж, нє пре политику алє прето же є спортиста шветового ранґу, може дацо виявиц и же тото пренєшу вельке число медийох. Праве вон горватскей репрезентациї пожадал же би були найлєпши. Вшелїяк, як ше обчекує од найлєпших спортистох, горватски репрезентативци му тиж одвитовали и пожадали му най победзи у Вимблдонє. И вон победзел, а Горвати постали вицешампионє швета у фодбалу. И вони свойо посцигли. Можебуц политичаре думаю „же ше першу мержню нє забува”, алє им вше вецей людзе обрацаю хрибет. Наздавам ше же час роби на хасен таким як Новак, а нє тим цо нє крию мержню ґу другим и иншаким. Прето сом за Новака навиял.

ПОВЯЗАНИ ТЕКСТИ