ВУКОВАР/ПЕТРОВЦИ (РЕПУБЛИКА ГОРВАТСКА) – Нєшка и на ютре, 28 и 29. септембра, у Вуковаре и у Петровцох у Републики Горватскей будзе отримана Културна манифестация „Кед голубица лєцела”.
Програма почнє нєшка на 18,30 годзин у Городскей библиотеки у Вуковаре дзе будзе представена кнїжка Дюри Лїкара „Златни нїтки Миклошевцох”, а потим будзе друженє госцох и учашнїкох на програми „З рускей кухарки”.
На соботу, 29. септембра, на 9 годзин почнє зашеданє Шветовей ради Русинох/Руснацох/Лемкох у уряду Ради рускей националней меншини Городу Вуковар, потим на истим месце и зашеданє Шветового форуму русинскей младежи, а будзе представена и апликация „Руски словнїк”.
У пополадньових годзинох програма будзе предлужена у Петровцох дзе на 16 годзин будзе покладанє венцох на Памятнїк горватским бранительом и памятнїк Любици Сеґеди-Фалц. Потим, на 16,30 годзин у Доме култури будзе вистава роботох Ружици Киш „Подобово крочаї”, а на 17 годзин Служба Божа у церкви Покрову Пресвятей Богородици.
У предлуженю програми на 18 годзин будзе презентация роботи „15 роки Дружтва Руснак”, а потим и културно-уметнїцка програма „Кед голубица лєцела” у хторей наступя члени културно-уметнїцких дружтвох зоз вецей местох. Госци на тогорочней манифестациї, медзи другима, и КПД „Дюра Киш” зоз Шиду, як и велї солисти, поетове и рецитаторе русинских/руских/лемковских здруженьох.
Тогорочна Културна манифестация „Кед голубица лєцела” отримує ше под покровительством Совиту за национални меншини Републики Горватскей, и финансийну потримовку Вуковарско-сримскей жупаниї, општинох Стари Янковци и Боґдановци, Ради рускей националней меншини Городу Вуковар и Представнїка рускей националней меншини Городу Заґреб, а соорґанизаторе Городска библиотека Вуковар, Месни одбор и ДОД Вуковар.