Часто слухаме же сучасни живот приноши вельо обовязки и углавним надосц шедзеня, цо вшелїяк нє добре, як совитую фаховци. Же би тоту каждодньовосц дакус пременєли Славен Провчи и його шовґор Срдян Добриєвич зоз синами Неманьом, абсолвентом економиї у Новим Садзе и Николом, студентом другого року економиї, тиж у Новим Садзе, рекреативно гоня бициґли.
На даскельо заводи вожели свойо бициґли по озеро Сот, нєдалєко од Шиду, а вец ше у септембру одшмелєли рушиц вельо длугшу драгу – до Нового Саду.
– Рушели зме у пополадньових годзинох. Перше зме ше даскельо минути застановели при Сотским озеру, а потим и у Илоку у Републики Горватскей, дзе зме ше и фотоґрафовали. По кратким одпочивку зме предлужели до Нового Саду дзе зме сцигли вечар. Гоч маме стандардни бициґли, блїзко 70 километри драги зме прешли за 3,5 годзини – приповедаю Славен Провчи и Срдян Добриєвич.
У Новим Садзе ноцовали, а ютредзень рушели назад до Шиду, алє тераз пременєли драгу и одлучели врациц ше прейґ Фрушкей Гори. Рушели на 11 годзин прейґ Лединцох, Змаєвцу и Летенки, та вец далєй ґу Дивошу, Бинґули, Ердевику и до Шиду. Тота драга, медзитим, була вельо чежша и мала досц спокуси.
– Од Лединцох ґу Змаєвцу зме гонєли по нєкатеґорованей (лєсовей) драги дзе требало исц и до брега, та зме на дзепоєдних местох бицґли мушели дриляц, наиходзели зме на препреченя як цо поваляни стебла. У єденй хвильки почал и диждж, а случело нам ше же зме на єден завод и заблукали у лєше на такей драги та нам требало два годзини же бизме ше ориєнтовали и вишли на прави напрям и предлужели драгу. И ґуми зме пребили, та зме их мушели поплатац, цо тиж дакус одбрало часу. Дому зме прето сцигли у вечарших годзинох – приповедаю младши члени фамелиї Неманя и Никола.
Нашо собешеднїки гваря же нє побановали же ше дому врацале прейґа Фрушкей Гори, бо як надпомли, тераз мали можлївосц лєпше упознац єй природу и красоти хтору з авта и у швидкосци анї нє було можлїве упознац и уживац у красоти Гори и лєса. Додаваю и же и надалєй рекреативно буду вожиц бициґли и же планую исц и на длугши драги, та можебуц на яр и звонка гранїци Сербиї.
У плану им и надалєй уживац у природи и рекреировац ше, та и без бициґлох, односно пешо. Славен и Неманя уж ше мали єдну таку авантуру початком априла того року кед рушели зоз Шиду пешо до Борова Села у Републики Горватскей.
– Рушели зме рано коло осем годзин и зоз собу вжали лєм потребни документи, воду и дацо поєсц так у драже. Дакус нам и слунко завадзало бо уж теди „пражело“ та зме почарнєли алє зме задовольни до Борового Села сцигли коло 18 годзин. Чекала нас вечера и торта, а ютредзень Срдян пришол на авту по нас – гваря Славен и Неманя.