Сам наслов то виреченє котре вигваряю людзе котри, у ствари, нє слухаю нїч. Точнєйше, то музични смак младeжи котра народзена после Дейтонского спорозуменя. Подрозумює познаванє гард рок бендох, алє ше источашнє до нєба дзвига култ Цеци, або Карлеуши. У ствари, анї нє знаю хто була Силвана Арменулич, алє зато знаю же у ґрупи Нирвана бул гевтот шпивач „цо ше рокнул”. Нє правим ше же сом оперована од народнякох, нїхто од нас нє, и то лєм пре факт же зме примушени жиц у Сербиї, дзе каждодньово мож слухац або видзиц даяки нови гит. Кед нє дома, вец у сушеда, на улїци, у пекарнї, та и у кафичу. Такволана новокомпонована, або турбо музика то найтуньша форма забави котра вообще нє вимага вельо, а анї нє ма даяку глїбину. Силикони зато найважнєйши фактор у шицким тим. Такой за нїма шльокици и циркони. Кельо ґод чловечество прешло вельку и длугоку драгу, мож повесц же нам вредносц порушованя єднака нули. Якош ше дружтво ґурло назад на координантни початок кед же у питаню морални вредносци и уровень свидомосци. Тото би нє требало звучац яґод даяки клише и любела бим обкеровац пропаґованє квазиморалу.
Нашо дружтво, а окреме младеж констатно деґрадована. Ноцни виход подрозумює туню музику, скоро голе (нє)облєканє и превершене конзумованє алкоголу. Реалити програми дзе старлети главни гвизди почали буц цошка на цо ше младеж упатра и сцу буц як вони, и то лєм пре фалшиви привид реалносци. На каждим крочаю ше ґлорификує спреводзка, алкоголизем и насилство. И вец ше чудуєме же уровень насилства нагло пороснул нє лєм у школи, алє вшадзи вообще. Константно ше бомбардує младеж зоз такима змистами. На билбордох естрадни уметнїци (кед же их вообще и мож так наволац), у спотох тверкую скоро голи, маю сексуални одношеня по тоалетох и пропаґую животни стил котри нашо млади лїґаю. И прецо би вец єдно просекове дзивче вжало кнїжку до рукох и образовало ше, кед у медийох може видзиц же ше до пенєжу и лагодного живота доходзи зоз глїбоким деколтеом, кратку сукню и проституцию?
Можебуц тераз права хвилька же би ше фокус обрацело на позитивни приклади. Порушац младеж же би ше образовали, занїмац зоз спортом, уметносцу. То би бул круциялни поступок кед бизме сцели здравше и квалитетнєйше дружтво. За саму деґрадацию музики виновата виключно публика. Кед би публика нє потримовала таких виводзачох, вони би просто нє могли исновац. Або, опорцийовац таку файту музики и уложиц пенєж до младих талантох, або до едукативних цильох. Могло би оформиц нови медиї котри би пущали музику домашнєй и странскей алтернативней сцени и так би ше дало можлївосц висц зоз мутлянки турбо-фолку и вец бизме сами виберали цо будземе слухац. О смакох би нє требало дискутовац, алє би требало оможлївиц доступносц даяких других алтернативних ришеньох.
Зоз критичним роздумованьом ше мож спроцивиц тим котри креирую явне думанє и так зопрец кажду форму манипулациї. Нє проблем у музики котру ше слуха, покля ше роздумує зоз власну главу. А кед ше почнє озбильно роздумовац… Е, теди ше мож поволац на присловку: „Поведз яку музику слухаш, и повем ци же яки ши”.
Становиска висловени у тим тексту виключно авторово и нє вше одражую ушорйовацку политику новинох „Руске слово”.