БИКИЧ – Вчера, на швето Сошествиє Святого Духа – Русадля, у Бикичу отримана традицийна манифестация „Пришли нам Русадля“, хтора почала зоз Службу Божу у церкви Успения Пресвятей Богородици. Службу служел парох о. Владимир Еделински Миколка, а на Служби пошвецени и нови кивот и подзелєни подзекованя донатором котри допомогли у билєню церкви.
По Служби шлїдзело стретнуце подпредсидательки Народней скупштини Сербиї Ґордани Чомич, народних посланїцох Олени Папуґа и Нади Лазич, як и Оливери Радованович зоз Желєнєй мрежи Войводини и Наташи Шакота, представительки Мисиї ОЕБС-у у Беоґрадзе, у рамикох иниїциятиви „Шлїдзце нас“, хтори з представительками Здруженя женох „Бикичанки“ бешедовали о потримовки лєпшому положеню женох у руралних штредкох.
У рамикох Манифестациї „Пришли нам Русадля“ на етно-штандох вецей здруженьох женох зоз шидскей општини були виложени рижни ручни роботи, а у Етно-хижи у Бикичу отворена вистава вишиваних заглавчкох.
Централна програма бул концерт у Доме култури, на хторим, окрем наступу своєй Шивацкей ґрупи, аматере домашнього КПД „Иван Котляревски“ премиєрно виведли сценски приказ оберачки грозна.
На програми наступели и Старша мишана шпивацка ґрупа КПД „Дюра Киш“ зоз Шиду, як и госци з Ужгороду, з України – трио „Мелодия“ и трио „Рапсодия“, хтори виведли венчики шпиванкох зоз свойого краю.
После концерту, хтори тирвал скоро два годзини, з танцом и шпиванку почало рубанє „майского древка“, а Манифестация закончена зоз заєднїцку вечеру учашнїкох и госцох.
