НОВИ САД – Новосадска жимска манифестация „Лядови лєс” отворена пияток, 15. децембра у Дунайским парку.
На шветочним отвераню наступели наймладши членїци Корчоляшского клубу „Войводина”, наймладши гокеяше Клуба „НС Старс”, як и „Гаос” аниматоре хтори пририхтали специялну програму з рижнима анимациями и акробациями на лядзе. Нащивительох „Лядового лєсу” забавял бенд „Пейц плус” и ди-джейове „Мрвица/Мрвица Юниор”.
Вкупна поверхносц под лядом находзи ше на 1 400 квадратних метерох у спортско-рекреативним комплексу, од хтори 450 квадрати метери надкрити, а ту и „Шнїгов город” дзе свойо продукти понукню вельочислени продукователє и тарґовци. Под час манифестациї буду отримовани рижни културно-уметнїцки и забавни програми на музично-сценскей бини.
Як и прешлого року, у першей змени, од 9–10,30 годзин, дзец до 12 рокох годни ше безплатно корчоляц. Уходнїца за корчолянє през тидзень кошта 200, през викенд 250 динари, а корчолї мож виєднац за 200 динари.