НОВИ САД – На Трецей програми радия Радио-телевизиї Войводини на програми по руски ютре, на нєдзелю, 11. oктобра, на 7 годзин рано годно послухац Емисию за валал, а на 12:30 годзин емисию Културна панорама.
У найновшим виданю Емисиї за валал будзе слова о тим же жатва польоприврдених културох з векшей часци закончена, та ше парасти помали починаю пририхтовац за шлїдуюцу сезону. Од аґронома достати совити же хтори култури найвигоднєйше шац. У коцурским хотаре почало зберанє лїсковцох, а малинаре сезону обераня приводза ґу концу. У емисиї нє буду вихабени анї найновши висти зоз польопривреди, проґноза хвилї за наиходзаци тидзень, як и цени польопривредних продуктох на новосадских пияцох.
Емисию пририхтую Єлена Дудаш, Златко Колєсар, Михаил Рамач.
Емисия за валал на програми кажду нєдзелю на 7 годзин рано и репризно стреду на 21:30 годзин, на УКТ габох радия РТВ на 92, 100 и 107,1 мгг, а мож ю послухац и на одложеним слуханю на сайту Радио-телевизиї Войводини.
Потим, на 12:30 годзин у найновшей емисиї Културна панорама годно послухац шлїдуюци прилоги: у РКЦ у Новим Садзе почина нова театрална сезона, у Вербаше отворена подобова вистава Силвестера Макая, на Фестивалу духовней шпиванки у Снїни участвовал Церковни хор Успения пресвятей Богородици зоз Коцура, а наяви ше и Фестивал тамбурових оркесторх Ораховска єшень и означованє 25-рончнїци Дружтва Руснацох у Суботици.
Редакторка и водителька емисиї: Мирослава Даждиу.
Емисию Културна панорама ше емитує кажду нєдзелю на 12:30 г и репризно на 23:00 г, а мож ю послухац на УКТ габох радия РТВ на 92, 100 и 107,1 мгг, и на одложеним слуханю на сайту Радио-телевизиї Войводини.