КОЦУР – Остатнїх дньох у околїску Коцура, на коцурским беґелю у напряму Вербасу и на вецей локацийох у коцурским хотаре, як и у хотаре у напряме Змаєва, вибили вецей огнї у котрих мушели интервеновац огньогасци зоз Добродзечного огньогасного дружтва Коцур.
По словох командира ДОД Коцур Саши Тодича, прешлого тижня каждого дня мали по два або три, дакеди и штири интервенциї. Вецей огнї ше трафели у вечарших и ноцних годзинох, та часто на терен виходзели и по ноци. Як гварел, период ламачки кукурици критичнєйши кед слово о огньох як период косидби, та су активнєйши у дежурствох и нєпреривно су у приправносци.
Тиж, у валалє бул случай же ше при топеню запалєл и комин у єдним обисцу, та коцурски огньогасци и ту интервеновали. Понеже им помоц коло апаратох за гашенє огня вше потребна, єдна особа зоз валалу, котра жадала остац анонимна, обезпечела донацию и подаровала им пейц апарати.
По информацийох котри зме достали од командира Тодича, причина огньом остатнїх дньох найчастейше людска нєдзбалосц, алє як гвари, було и огнї котри виволани нароком, лєм виновнїк нє влапени.
Чкоди после огньох остали вельки, визначел Тодич. Згорела велька поверхносц коло беґелю Дунай-Тиса-Дунай дзе жиє дзивина и дзе ловаре ловели, а тота часц була и полєшована зоз вельким число баґренових древкох. Тота часц коло беґелю тераз цалком знїщена, и будзе требац часу же би ше тото шицко ознова обновело.
Апел котри Тодич и коцурски огньогасци вше повторюю то же би ше нє палєло на отвореним просторе. Тиж, контроли змоцнєни и будзе ше знїмац и зоз дроном, а кед ше виновнїка влапи же палї огень, будзе мушиц плациц високи пенєжни кари.
На концу Тодич надпомнул же у случаю вибиваня огню, обовязно волац число 193.
