ЖАБЕЛЬ – По сообщеню Явного комуналного подприємстава „Чистота” Жабель чия дїялносц и управитель з вашарами у општинских местох, у викенду пред нами, на нєдзелю, 18. октобра будзе отримани перши вашар у Жаблю после преглашованя териториї Општини Жабель за заражене и уґрожене подручє.
Понеже 14. юлия того року утвердзене иснованє афруцкей чуми при швиньох у населєним месце Жабель, запровадзени вецей мири на териториї цалей општини, а на основи ришеня Министерства польопривреди, лєсарства и водопривреди, Управа за ветерину з цильом застановйованя ширеня африцкей чуми, як єдну з мирох уведла же забранєне и орґанизованє вашарох.
На нєдзелю будзе вашар, алє на нїм нє будзе часц пияц статку, так же забранєне доводзенє и викладанє животиньох.
Кед забране орґанизованє вашару у Жаблю, у юлию того року, медзи гражданами ше почало бешедовац же ше планує цалком утаргнуц вашар у Жаблю, медзитим по компетентни зоз ЯКП „Чистота” гваря же о тим нє було слова и же ше таке нє планує.