НОВИ САД – Покраїнски секретар за польопривреду, водопривреду и лєсарство Вук Радоєвич тих дньох уручел 14 контракти хасновательом безповратних средствох у рамикох двох конкурсох – за процес лєбо предлуженє розпочатей комасациї, и за правенє нових лєбо реконструкцию старих рибаловох на териториї АП Войводини у 2017. року.
За процес нових поступкох комасациї видвоєни 118 милиони динари, за цо подписани седем контракти, а за предлуженє поступку 101 милион динари за цо подписани контракти зоз штирома локалнима самоуправами.
Покраїнски секретар Радоєвич визначел и же за вибудов нових и реконструкцию постояцих рибаловох у АП Войводини, прейґ конкурсу видвоєни 38 милиони динари, з хторима ше пооправя 95 гектари постояцих и вибудує 6,5 гектари нових рибаловох.
Тиж, Радоєвич визначел же ше з такима мирами аґрарней политики предлужи и у 2018. року, уважуюци ИПАРД програму.