НОВИ САД – У Заводзе за културу войводянских Руснацох у Новим Садзе вчера отримана промоция першого тому кнїжки „Руснаци” автора Дюри Латяка хтору концом прешлого року обявело НВУ „Руске слово”.
О кнїжки бешедовали єй редактор Микола М. Цап, рецензент мср Саша Сабадош и редакторка културней рубрики у „Руским слове” Олена Планчак Сакач, а модератор промоциї хтору орґанизовал Вивершни одбор Националного совиту Руснацох и його координатор Йовґен Мудри, бул редаактор Видавательней дїялносци НВУ „Руске слово” Микола Шанта.
О текстох хтори вибрал за обявйованє у кнїжки „Руснаци”, алє и о мотивоох же би после вецейдеценийней професийней кариєри, и у пензионерских, озбильних животних рокох и далєй витирвало и студиозно виглєдовал и писал, бешедовал и Дюра Латяк. Числени нащивителє на промоциї тиж мали нагоду подзелїц упечатки и подзековац Латякови на шицким цо поробел, и цо ище витвори у наиходзацих рокох за руску националну заєднїцу.
У першим томе „Руснацох” друковани вибор з публицистичних роботох Дюри Латяка хтори вон о найрижнороднєйших аспектох рускей култури, рускей прешлосци и питаньох руского националного идентитету писал и обявйовал през остатнї скоро 50 роки. Понеже за тоту кнїжку ище скорей як є обявена було виселектоване и пририхтане скоро два раз вецей материялу з Латяковей творчосци од планованого обсягу, треба обчековац и єй други том.
