ВЕРБАС – Општина Вербас, стреду 26. децембра, достала буджет за 2019. рок, хтори проєктовани на 1,55 милиярди динари, односно за 10,2 одсто вецей як у 2018. року.
Як потолковал предсидатель Општини Милан Ґлушац, плановане звекшанє фундаментоване на звекшаню порциї на заробки од 25 милиони динари, звекшанє порциї на приходи од самостойних дїялносцох од штири милиони динари, потим приходи од порциї на маєток буду звекшани за дзевец милиони динари и друге.
На шеснастей схадзки локалного парламенту одборнїки прилапели и Одлуку о ребалансу буджету за 2018. рок, принєшени Локални антикорупцийни план, прилапена Одлука о локалних комуналних и административних таксох и надополнєню за защиту и унапредзенє животного штредку. Ґу тому, прилапени и програми дїлованя шицких явних и комуналних подприємствох и установох, а розправяло ше и о стану безпечносци транспорту на драгох у општини Вербас, як и Стратеґийним плану розвою социялней защити за период од 2018. по 2021. рок.
На дньовим шоре було и предкладанє статуту општини Вербас, а тиж так и одлуки о просторним розпорядку явних основних школох и ПУ “Бошко Буха”. Одборнїки дали согласносц же би ше комунални подприємства “Комуналєц” и “Стандард” длугорочно кредитно задлужели.
На концу, Скупштина општини принєсла и ришенє о утвердзованю назвох улїцох спрам хторого 36 позициї у шицких местох општини достало нови мена. На тот завод, першенствено ше роздумовало о историї самого городу и местох у општини, та так свойо улїчки достали велї заслужни гражданє. 