ШИД – На вчерайшей схадзки Скупштина општини (СО) розришела длужносци двох членох Општинскей ради – Драґана Ґутича и Живана Илича, а за нових членох з тайним гласаньом, вибрани Милош Милошевич зоз Шиду и Теа Милич зоз Ґибарцу.
СО тиж потвердзела одборнїцки мандат Йовови Лазичови, пензионерови зоз Моровичу з вибернковей лїстини СПС – ЙС, после задзекованя Деяна Лоґарушича, одборнїка СПС, хтори на прешлей схадзки СО дал задзекованє пре зраженє интересох з оглядом же є меновани за директора Центра за социялну роботу.
Одборнїки принєсли и одлуку о порушованю поступка за виробок нового Статута општини, а место Небойши Ковачевича хтори задзековал на функцию директора Установи за физичну културу и спортску рекреацию „Партизан“ як о.д. директора меновала Николу Тараїча, дипломованого менаджера зоз Шиду.
На схадзки найвецей точки дньового шора були вязани за кадрово пременки у скупштинских роботних целох, потим пременки членох у школских одборох, як и надпатраюцих и управних одборох подприємствох и установох чий снователь локална самоуправа.
