БАЧИНЦИ – Новинско-видавательна установа (НВУ) „Руске слово” з Нового Саду, у рамикох акциї дарованя кнїжкох библиотеком у местох дзе жию Руснаци пияток, 13. априла, подаровала кнїжки парохиї Церкви Святого апостола Луки у Бачинцох и Основней школи „Бранко Радичевич”– оддзелєню у Бачинцох.
Кнїжки за читачох у бачинскей парохиї уручени парохови о. Даркови Рацови, а за читачох у бачинскей школи наставнїци руского язика як виборного предмету Златки Сивч Здравич, у присустве школярох, хтори виучую руски язик як виборни предмет.
Представнїци НВУ „Руске слово” – директорка Мартица Тамаш, одвичательна редакторка Часопису за дзеци „Заградка” Мелания Римар и новинарка-редакторка Мария Афич, як и парох о. Дарко Рац, присуствовали на годзини руского язика як виборного предмету, на хторей, вєдно зоз наставнїцу, визначели важносц знаня мацеринского руского язика.
Подаровани два комплети од по 150 кнїжки, блїзко 70 наслови наших познатих писательох, углавним на руским язику и даскельо на сербским язику, хтори у остатнїх даскельо рокох обявело „Руске слово”, од єдного по три прикладнїки по наслову.
Попри романох, збиркох приповедкох и писньох на руским язику, медзи подарованима кнїжками и збирки драмских текстох и кнїжки з обласци историоґрафиї, науки о язику и литературней критики, як и поезия и проза за дзеци и младих.
Акция дарованя кнїжкох школским, месним и библиотеком КУД и парохийох, хтору „Руске слово” почало у 2017. року, предлужує ше у 2018. року.
