РУСКИ КЕРЕСТУР – З Основней школи „Петро Кузмяк” 70 школяре од другей по осму класу штварток, 9. марца, участвовали на националним Математичним змаганю „Мислиша 2017”, хторе источашнє отримане у шицких заинтересованих школох у Сербиї.
З керестурскей Школи математични задатки, як тест, ришовали 36-еро у младшим возросту (од другей по штварту класу), и 34-еро школяре у старшим возросту (од пиятей по осму класу ОШ).
Змаганє уж 12. раз орґанизує Математичне дружтво „Архимедус” з Беоґраду, а як дознаваме од координаторки змаганя у керестурскей Школи, професорки математики Татяни Бучко Рац, у тей школи змаганє було штварти раз.
По сумированю резултатох змаганя на основним уровню, цо окончує Дружтво „Архимедус”, у априлу будзе и финалне змаганє найлєпших школярох.
Подобне змаганє, алє за штредньошколцох – Медзинародне математичне змаганє „Кенґур” будзе 16. марца у орґанизациї Дружтва математичарох Сербиї, а з керестурскей Штреднєй школи ше на ньго приявели 20 школяре.