ЛЬВОВ – Всоботу, 24. фебруара, на 15 годзин по нашим чаше, отримане зашеданє Предсидательства Шветовей федерациї українских лемковских орґанизацийох (СФУЛО), котре зволала предсидателька Ярослава Галик. Зашеданє першираз отримане прейґ скайпу, а на нїм участвовали дзевец од петнац членох Предсидательства котри ше у тей хвильки находзели у вецей розличних часових зонох.
На початку зашеданя з минуту цихосци дата почесц др Иванови Гвоздови, першому предсидательови СФУЛО. Потим предсидателька Галик поднєсла звит о дотерашнєй роботи, финансийни звит и план роботи за наиходзаци период. Предсидателє и представнїки субєктох СФУЛО тиж поднєсли звити о дїялносци у предходним периоду. Догварене же би ше у септембру у Львове отримало наукову конференцию у вязи з подїями на Лемковини од 1944–1951. року, на тему депортациї Лемкох, за цо розписани и конкурс за ґрафичне ришенє – симбола за хаснованє у друкованей продукциї и найкрасшу ґрафичну идею за видаванє ювилейней монети.
У дальших розгваркох догварене же би ше орґанизовало науково конференциї о историї Русинох/Лемкох, и же би ше вєдно анґажовали у акцийох зопераня зявеньох сепаратизма у субетнїчних територийох дзе компактно жию Русини/Лемки/Українци. Пре лєпше медзисобне информованє наглашене же треба повязац сайти субєктох СФУЛО.
Члени Предсидательства указали вельке интересованє за литературу у Сербиї у котрей ше обрабя теми з историї бачванско-сримских Руснацох, етноґрафиї, записи писньох и друге, як и медзисобне повязованє и медзисобни нащиви на фестивалох Русинох/Лемкох/Українцох у Сербиї, Словацкей, Польскей и України.
Спред Союзу Руснацох Українцох Сербиї, у роботи Предсидательства вжали учасц Боґдан Виславски, предсидатель Союзу и Велимир Паплацко, заменїк предсидателя Союзу.
Идуце зашеданє Предсидательства будзе отримане у Ждинї (Польска) штредком юлия того року, под час отримованя Фестивала ,,Лемковска ватра”.