НОВИ САД – Покраїнски секретарият за реґионални розвой, медзиреґионалне сотруднїцтво и локалну самоуправу на чолє зоз секретаром Оґнєном Бєличом, подписал ришеня о субвенцийох векшей як 9,6 милиони динари зоз хаснователями котри право на средства витворели по основи Конкурса за софинаносованє проєктох за унапредзенє вирабяня и запровадзованя ефикасних реґионалних и локалних явних политикох и Конкурса за софинансованє проєктох за унапредзенє роботних и управяцких капацитетох у єдинкох локалней самоуправи на териториї АП Войводини.
З тей нагоди секретар Бєлич гварел же од вкупно 9,6 милиони динари, 8,5 милиони опредзелєни општином Ириґ, Опово, Сечань, Житиште, Кула, Бачка Паланка, Жабель, Нови Бечей и городу Сримска Митровица.
Вон наглашел же безповратни средства видвоєни же би ше тоти локални самоуправи стимуловало у управяню зоз власним розвойом през пририхтованє и применьовенє документох розвойного планованя и документох явней политики.
Резултат того, як оценєл Бєлич, будзе прилапйованє стратеґийних планох розвою, секторскей стратеґиї и вирабянє або ревидированє акцийних планох у єдинкох локалней самоуправи на териториї АП Войводини.
Вецей як єден милион динари унапрямени за општини Србобран, Канїжа, Зомбор, Ириґ и Бач, а буду похасновани за реализацию проєктох котри стимулую розвой и унапредзенє административних, роботних и управяцких капацитетох, потолковал Бєлич визначуюци же тоти проєкти доприноша розвою ефикасней и модерней локалней самоуправи у функциї гражданох и привреди.