Умар Иван Чакан

автор любица отич
1.1k Опатрене

НОВИ САД – Тих дньох, у своїм 67-им року живота умар Иван Чакан (1952 – 2018), визначни етнолоґ и музейни совитнїк Музею Войводини.

Иван Чакан народзени у Руским Керестуре 6. новембра 1952. року, од оца Стевана (Штефана) Чакана, професора, новинара, єдного од сновательох новинох „Руске слово“ и мацери Гелени.

Ґимназию закончел у Новим Садзе, а потим дипломовал етнолоґию у Беоґрадзе (1978). Свою кариєру започал як млади етнолоґ у тедишнїм Войводянским музею (1980), на месце Етнолоґа за привреду и технолоґию дзе остал по 2017. рок, кед пошол до заслуженей пензиї.

У своєй кариєри витворел вецей тематск вистави з обласци историї польопривреди и то у Музею Войводини и музейним комплексу у Кулпину, а єден є з авторох сталней поставки Музея Войводини.

Окрем виучованя розвою польопривреди и польопривредних орудийох, робота Ивана Чакана ше засновала и на теренских виглєдованьом котри були состойна часц його каждодньового живота. Його жажда за новима историйно-етнолоґийним фактами, як и музейнима предметами зоз тей обласци, нє познала дружтвено устроєни гранїци. Як  особа з виражену индивидуалносцу, нєзвичайно лєгко успоставял контакт з людзми на терену. Бул вельки прихильнїк фотоґрафиї як документу и шлїду прешлосци и прето вше и на каждим месце зазначовал шицко цо по його думаню було значне як єдна файта скарбу. Так нам зохабел  огромне богатство фотоґрафийох, окреме з местох дзе жию Руснаци, зоз чию ше прешлосцу занїмал през цали свой роботни вик, у рамикох своєй основней роботи – кустоса етнолоґа.

Як резултат його виглєдовацкей роботи, настали и два моноґрафиї; „Традицийне овчарство у Войводини – форми здружованя статкарох (2011) и „Пажицове статкарство у Войводини – пастирски термини” (2017).

Иван Чакан бул визначни фаховец. Любел природу и людзох. Дзечнє помагал младим колеґом котрим щиро даровал свойо знанє. У нїм ше злучовали и преплєтали два особи – боема и велього фаховца. И на концу, бул насампредз – добри чловек.

Слава му!

ПОВЯЗАНИ ТЕКСТИ