РУСКИ КЕРЕСТУР – Пондзелок, 12. марца, у Руским Керестуре упокоєл ше наш познати музичар, єден з найлєпших тамбурашох медзи Руснацами (та и вельо ширше), предняк дакедишнього популарного тамбурашского составу „Кирданци” и член вецей оркестрох Дому култури Руски Керестур – Янко Гайдук Омер (1937–2018).
По професиї бул машински шлосер, алє як музичар, баспримаш, Янко Гайдук (Кирдов) Омер бул активни у културним живоце Руснацох понад 40 роки. Зоз музику ше активно почал занїмац ище як леґиньчок, а по одслуженю войска, концом пейдзешатих рокох прешлого вику, вєдно зоз своїм братом Славом, контрашом, и ище даскелїма музичарами зоз сушедства на керестурским Ґаравцу, основал тамбурашски состав „Кирданци”, котри, з меншима вименками, бул активни коло 30 роки и популарни надалєко споза гранїцох керестурского хотара.
И попри тим же мал поволанку и нагоду, вєдно зоз своїм колеґом по тамбури Мироньом Гардийом Йолетом, постац професионалєц у Тамбурашским оркестру Радия-Нови Сад, у котрим теди були познати мена як цо леґендарни Яника Балаж, Цвета Сладич Чича, Чарни Стева, Пишта Корманьош и други, Янко, лєбо Омер по назвиску, як го векшина знала, ше, заш лєм, опредзелєл за живот у Руским Керестуре и єдну файту полупрофесийного статусу у своїх „Кирданцох” и оркестру Дому култури, зоз котрима седемдзешатих рокох прешлого вику єден час грал и у тедишнїм КУД „Максим Горки” у Новим Садзе и вербаским Дому култури. Зоз шицкима тима колективами госцовал ширцом дакедишнєй Югославиї, а вельо раз и поза єй гранїци. Грал на першей рускей ґрамофонскей плочи (1971),участвовал на велїх „Червених ружох”, на „Ружовей заградки”, грал на вецей як 1 000 свадзбох, балох, рижних вешельох по шицких руских и велїх других местох… За нїм остали вельочислени тонски и аудиозаписи у Радию и Телевизиї Войводини, як и єдна аудио касета зоз рускима народнима и авторскима шпиванками „Грайце ґудаци”.
Янко Гайдук Омер поховани 13. марца на керестурским теметове.
Най му будзе вична памят!