НОВЕ ОРАХОВО – Традицийна програма з нагоди 13. мая, дня доселєня Руснацох з Руского Керестура до Нового Орахова, хтора и у Календаре репрезентативних манифестацийох Националного совиту (НС) Руснацох, того року отримана праве на дзень доселєня, всоботу, 13. мая, а була ище шветочнєйша понеже з ню означена и 70-рочнїца снованя ораховского КУД „Петро Кузмяк”.
КУД „Петро Кузмяк” Руснаци у Новим Орахове основали такой рок по приселєню и з нагоди ювилею, терашня предсидателька КУД Татяна Дудаш на програми, на хторей госцох привитала по руски, сербски и мадярски, подзековала шицким дакедишнїм и терашнїм членом Дружтва на їх нєсебичней роботи, як и шицким котри помагаю и потримую роботу КУД.
На длугорочней и наисце витирвалей роботи у ораховским Дружтве у вецей обасцох, та и у рускей култури, Дудашова окреме подзековала Владимирови Маґочови, и як гварела уручуюци му пригодни дарунок – „Нєт култури без Маґоча и нєт Маґоча без култури”. Пригодни дарунок, як подзекованє за його роботу, терашня предсидателька Дружтва уручела и свойому предходнїкови Михайлови Еделинсковому.
На 71-рочнїци приселєня до Орахова и 70-рочнїци роботи КУД „Петро Кузмяк” Ораховчаньом на програми повинчовали член НС Руснацох Сашо Сабадош, коцурски и ораховски парох о. Владислав Рац, як и Йоаким Грубеня спред Союзу Руснацох Українцох Сербиї, а медзи госцами на програми були и руководителє Месней заєднїци, ОШ и здруженьох з Нового Орахова.
У програми участвовали шицки секциї КУД „Петро Кузмяк” – дзецински литературна и танєчна, Женска жридлова шпивацка ґрупа, соло-шпиваче, фолклорна секция старших и оркестер, а у голу биоскопу була поставена етно-вистава секциї ручних роботох „Барвенок”. Як госци на програми участвовали Женска жридлова шпивацка ґрупа и члени дзецинскей танєчней секциї мадярского КУД „Ґраца Янош” з Орахова, а попри прейґ фотоґрафийох на видео-биму, о историяту КУД, як и Руснацох у Орахове, присутних на програми упознал и Владимир Маґоч.
По програми госци, учашнїки и домашнї друженє предлужели у Руским доме.