РУСКИ КЕРЕСТУР – Дзецински тидзень, хтори тирва од 3. октобра, у Основней и штреднєй школи з домом школярох „Петро Кузмяк” ма вельо рижнородни змисти, у зависносци од возросту школярох. Согласно з тогорочним мотом „Бриґи нє водзиме, бавиц ше любиме”, акцент бул на рижних бавискох, алє и гуманитарних и других активносцох.
Дзецински тидзень нєшка будзе закончени зоз спортским дньом за цалу Школу, односно єшеньским кросом на терену у лєшику при беґелю. Медзиґенерацийни спортски змаганя були и вчера, за шицких школярох ОШ, а на годзинох оддзелєнского старшини бешедоване о значносци Дзецинского тижня.
Штредньошколци котри виучую виронауку вчера нащивели старих на друженю у парохийним Каритасу, а интернатянє ше дружели и бавели з малима школярами у предлуженим пребуваню.
У рамикох Дзецинского тижня интересантни бул и математични квиз „Забавна математика”, дзе ше змагали школяре 3. и 4. класи з керестурскей и школи „Братство єдинство” з Коцура. Того року лєпши були домашнї, а квиз пририхтали ґимназиялци першей класи, з професорку Леону Сабо.
Школяре другей класи ОШ мали друженє и бавенє зоз своїма младшима, чи старшима братами и шестрами, а за матурантох була мотивацийна роботня о добродзечним даваню креви, понеже и сама акция у Школи будзе орґанизована 10. октобра.
Керестурска Школа у Дзецинским тижню вше пестує и гуманитарни аспект, та того року було орґанизоване зберанє половних учебнїкох, хтори буду подаровани школяром котрим то потребне.