РУСКИ КЕРЕСТУР – Нови керестурски парох о. Владислав Варґа всоботу пополадню 30. октобра ше першираз стретнул з предсидательом општини Кула Дамяном Миляничом, предсидательом совиту Месней заєднїци Руски Керестур Владимиром Олеяром же би их поинформовали о можлївосцох и початку будованя Духовного центру Емаус.
Шицки потребни формалносци уж покончени, починаюци од виробеного проєкту, пенєжних средствох котри обезпечени за першу фазу роботох, а очиглядне и жаданє и шицких присутних же би ше Центер почал будовац, потвердзел о. Варґа. Значносц того духовного центру наисце велька, а того бул свидоми и його предходнїк нєдавно упокоєни о. Михайло Малацко, котри и започал тот проєкт.
Предсидатель Милянич визначел же Општина ма красне сотруднїцтво зоз Керестуром и же познате же там, дзе ше церква розвива и цале ше дружтво розвива. Вон вєдно зоз Олеяром потвердзел потримовку локалних власцох и структорох за будованє Емаусу.
Тому стретнуцу у Водици присуствовали ище и керестурски капелан о. Михайло Шанта и предсидатель церковного одбору Михайло Рамач, та тутор водици Владимир Чижмар и представителє Церковного одбору.