НОВИ САД – Розвойна аґенция Войводини (РАВ) поволує шицких продуковательох швижей овоци и швижих заградових рошлїнох же би ше приявели за участвованє на першей од штирох подїйох под назву Дзень добавячох – Аґробизнис 2021.
Б2Б схадзки будзе ше отримовац онлайн каждого остатнього тижня у мешацу, наиходзаци штири мешаци, а домашнї добавяче буду ше мац нагоду представиц иножемним, домашнїм и реґионалним тарґовинским ланцом, дистрибутером, алє и вельким продуковательом поживових продуктох.
На перших Дньох добавячох, хтори заказани за 24 – 26. марец, домашнї привреднїки зоз сектора швижей овоци и швижих заградових рошлїнох годни ше представиц тарґовинскому ланцу число 1. у Европи, нємецкому ґлобалному ланцу Лидл Сербия.
Заинтересовани ше можу приявиц на приявним формулару на интернет боку Розвойней аґенциї Войводини РАВ-а rav.org.rs/sr/ и на истим боку находза ше и други деталї у вязи зоз тоту подїю.
Иншак, база добавячох Розвойней аґенциї Войводини, хтора ше находзи на адреси https://rav.org.rs/sr/become-supplier/ оможлївює компанийом зоз Войводини же би представели свойо капацитети и продукцийни програми, а компанийом хтори глєдаю добавячох, же би идентификовали идеалних партнерох за подмирйованє.