НОВИ САД/ВЕРБАС – Єден з найзначнєйших проєктох за Войводину и Сербию то и модернизованє гайзибанскей драги Беоґрад-Будапешт, хтора з найвекшей часци преходзи през Войводину, визначел предсидатель Покраїнскей влади Иґор Мирович на вчерайшей схадзки з представителями Транспортного центру ЦИП, Министерства будовательства, транспорту и инфраструктури, „Инфраструктури гайзибанских драгох Сербиї” и представителями городох и општинох през хтори драга преходзи – Нови Сад, Вербас, Мали Идьош, Бачка Тополя и Суботица.
На схадзки представени проєкт модернизованя спомнутей гайзибансйех драги, з акцентоим на єй часц од Нового Саду, прейґ Суботици по державну гранїцу, односно Келебию.
Предсидатель Општини Вербас Милан Ґлушац после схадзки гварел же Вербас ма єдну з найлєпших позицийох у Войводини, понеже през тоту општину преходза два найважнєйши драги хтори злучую юг и сивер континенту, так же модернизованє тей гайзибанскей драги розвойна шанса и за вербаску општину.
– Слово о укладаню од вецей стотки милиони еври, а на рижних роботох буду анґажовани и домашнї фирми. Општина Вербас да потребну потримовку за пририхтованє проєкту и пошвидко о тим будземе бешедовац и на окремних схадзкох у локалней самоуправи – гварел Ґлушац.