СУБОТИЦА – Скупштина Суботици вчера вибрала нове руководительство Городу, а за городоначалнїка вибрани дотерашнї директор подприємства „Електропривреда Сербиї дистрибуция” и предсидатель Городского одбору Сербскей напредней странки (СНС) Боґдан Лабан.
З векшину гласох вибрана и його заменїца – Тимеа Горват зоз Союзу войводянских Мадярох (СВМ), а у новим составе Городскей ради и седмеро члени зоз СНС, СВМ, Руху социялистох (РС) и Социялдемократскей партиї Сербиї (СДПС).
– Приоритети нам обезпечованє нових и лєпших дїловних амбиєнтох за отверанє нових роботних местох, приводзенє нових инвеститорох, преширенє индустрийней зони у шлєбодней зони у Малим Баймоку, укладанє до туристичней купелї Палич, та комунална и транспортна инфраструктура – гварел нови городоначалнїк Лабан.
На вчерайшей схадзки вибрани и нови заменїк предсидателя Скупштини Суботици Велько Войнич, зоз СНС.
Политични представителє Горватох у Суботици реаґовали прето же нєт представителя тей заєднїци у новим составе вивершней власци, окреме же праве пред даскельома днями премиєр Сербиї Александар Вучич и предсидателька Горватскей Колинда Ґрабар Китарович подписали спорозуменя хтори подрозумюю и векшу учасц Горватох у процесох одлучованя.