НОВИ САД – Покраїнски фонд за розвой польопривреди 15. фебруара розпише конкурс за кредити за набавку системох и опреми за наводньованє, нови погонски и приключни польопривредни механїзациї, за нови склєняни загради, пластенїки и опрему у нїх. Годно конкуровац и за кредити за набавку нових процивкаменцових мрежох у вецейрочних овоцнїкох и винїцох, та за набавку целятох за карменє. Наявене же конкурс будзе тирвац мешац, по 16. марец.
Покраїнски секретар за польопривреду, водопривреду и лєсарство Бранислав Боґарошки гварел же нароком перше розписани конкурси Покраїнского фонду, а конкурси за безповратни средства з Покраїнского секретарияту буду розписани познєйше.
– На тот способ обезпечиме польопривреднїком же би перше достали вигодни кредити, уложа тот пенєж, а потим конкурую до Покраїнского секретарияту за безповратни средства – гварел Боґарошки.
Директор Фонду Йожеф Сабо потолковал условия кредитох за шицки пейц кредитни линиї, за хтори рочна камата од 1 до 2 одсто. За набавку нових системох за наводньованє максимално будзе одобрена сума од 5 000 еври, за набавку погонскей и приключней механїзациї буду одобрени кредити до 20 000 еври, за склєняни загради, пластенїки и набавку нових процивкаменцових мрежох буду максимално 15 000 еври, а за набавку квалитетних целятох 15 000 еври.