РУСКИ КЕРЕСТУР – У видавательстве керестурскей парохиї св. оца Миколая прешлей нєдзелї вишло 6. тогорочне число Християнского часопису „Дзвони”.
Значне место у тим чишлє забераю написи о нєдавней паповей нащиви Сараєву, а представени и други актуални висти з вселенскей церкви, дзе и папово стретнуце з Владимиром Путином.
У рубрики Духовне заренко роздумованє як лєтнї одпочивок вихасновац и за обнову своєй вири, рубрика „Слово живота” предклада Исусово виреченє „Будзце шемели – я победзел швет” зоз шведоченями живота з рижних державох.
Рубрика „Сримски дожица” ма наслов „Св. Георгий ришел проблем”, ту и боки пошвецени роботи и историї нашого Каритасу, поезия о. Юлияна Раца и други духовни думки. З двома текстами „Дзвони” зазначую пририхтованє ґу ювилейом – церкви у Сримскей Митровици и першого манастиру Шестрох Служебнїцох.
У нових „Дзвонох” єст и новосци зоз живота у наших парохийох, о обновеним виданю кнїжки Мирона Жироша „Мили сину мой”, представена и нєзвичайна животна приповедка Пушкашовей фамелиї з Коцура, а вишли и нови предлуженя темох у додатку „Богословска думка”.