РУСКИ КЕРЕСТУР – У керестурскей парохиї св. оца Миколая внєдзелю вишло перше тогорочне число мешачного християнского часопису „Дзвони”.
У стаємних рубрикох „Дзвони” понукаю статї за духовне преглїбйованє и едукацию, як и виривки з казанї нашого владики Георгия з нагоди Централней преслави Националного швета Руснацох у Вербаше.
„Дзвони” преноша и порученє Папи Францизка фемелийом, котре винєсол на своїм нєдавним путованю на Филипини, як и актуалносци зоз вселенскей Церкви.
У рубрики „Стереотипи” розпатрене одношенє теизму, атеизму и масмедийох, а у 4. предлуженю о историї и сучасносци Каритасу текст о дїялносци двох вельких Оцох Церкви – Василия Велького и Йоана Златоустого.
Ту и рубрики „Сримски дожица”, „Слово Живота” и „Шведоченя”, як и предлуженє у додатку „Богословска думка” – „Теолоґия за каждого”. Рубрика „Шведкове вири” пише о Кяри Лубик, з нагоди початку преглашеня єй беатификациї, и шестри Елвири, сновательки познатих заєднїцох за лїченє зависнїкох „Ченаколо”.
Найновши „Дзвони” приноша и висти зоз живота у наших парохийох, на тот завод о нєдавно преславених шветох – Крачуну, Богоявлєню и з пошвецаня обисцох.