БЕОҐРАД – Министер финансийох Душан Вуйович виявел же ше акцизи на струю нє будзе виражовац процентуално, алє од 1. априла того року буду 0,5 динари по киловат-годзини.
Вон за новини „Политика” гварел же вистка о подрагшеню струї аж нєдавно потвердзена, бо Влада нє сцела обявиц програму хтора догварена з ММФ, покля борд директорох ММФ нє прилапи и обяви тоту програму.
– О тим ше бешедує уж длугши час, алє зме нє сцели обтерховац гражданох пред обяву. Вистка о подрагшеню могла одцагнуц увагу явносци з найважнєйшей позитивней ствари, а то же зме, после двох пробованьох, достали потримовку ММФ – гварел министер Вуйович.