БЕОҐРАД – З нагоди вчерайшого Медзинародного дня толеранциї у Беоґрадзе отримана и реґионална конференция з назву „Перши реґионални форум целох за ровноправносц юговосточней Европи”, на хторей поверенїца за защиту ровноправносци Бранкица Янкович виявела же ше найвекше число притужбох гражданох тей институциї, алє и целом за ровноправносц у реґионє, одноши на обласц роботи и обезпечованя роботи и поручела же тоти институциї зоз своїм дїлованьом муша потвердзиц же у реґионє мож жиц достоїнствено, з полним почитованьом принципох ровноправносци.
Янковичова на отвераню спомнутей конферецниї, на хторей спред Националного совиту Руснацох присуствовала членїца НС и його Вивершного одбору Наташа Макаї Мудрох, гварела и же толеранция основни принцип каждого дружтва.
Заменїца Покраїнского омбудсмана Ева Вукашинович вчера за РТВ гварела же у Сербиї ище вше присутни високи ступень нєтолеранциї, насампредз спрам чувствительних дружтвених ґрупох, гоч обачлїве и напредованє у тим поглядзе.
Додала же гражданє ище вше нє свидоми своїх правох и кеди су дискриминовани, визначуюци же у тим напряме треба едуковац младих у основних и штреднїх школох, бо, як гварела – ключ за толеранцию у воспитаню.
Медзинародни дзень толеранциї – 16. новембер, УНЕСКО запровадзел 1995. року, як надпомнуце же треба почитовац и уважовац иншаких од нас, прилапйовац богатство розличносцох, идейох, становискох, тих котри другей нациї, вири, сексуалних опредзелєньох, лєбо бешедую з другим язиком.