Вчера поховани режисер Петар Пера Уєвич

автор зам
1.2k Опатрене

КУЛА – У Кули вчера, 4. юлия, поховани познати режисер Петар Пера Уєвич, котри остатнї скоро штири децениї прешлого вику зоз свою режисерску роботу означел драмски аматеризем у Войводини и Сербиї, а за собу зохабел и замерковани режисерски твори у тедишнїм Аматерским, познєйше Руским народним театру „Дядя” (АРТ/РНТ), на його сцени у Руским Керестуре. Умар у Кули 3, юлия, у своїм 83. року живота.

Петар Уєвич народзени 28. юния 1934. року у Луковдолу, у општини Имотски у Горватскей, а дзецинство и вчасну младосц препровадзел у Станишичу, коло Зомбора, дзе и почал ґлумиц як аматер. После штреднєй економскей школу у Зомборе студирал економию у Сараєве, дзе ше баржей почал занїмац з театром, так же театралну кариєру започал як ґлумец у сараєвским Малим театру, а штредком шейдзешатих рокох прешлого вику, после удатней режиї єдней представи у Станишичу и єй учасци на реґионалней смотри у Кули, у тедишнїм Городским театру у Кули достал стаємни анґажман як режисер.

У кулским театру, односно Културним центре Кула робел цали роботни вик (до пензиї пошол 1992. року) и за коло 40 роки на сцени у Кули и у шицких местох кулскей општини, а и ширше, режирал коло 130 театрални представи, а два раз вецей рижни рецитали, сценски прикази, академиї, витворел и вецей замерковани ґлумецки витвореня. Його представи освойовали и награди на Покраїнскей смотри драмских аматерских театрох, як и на Републичним фестивалє, дзе участвовали 12 його режийни витвореня.

И нєшка старши любителє театру паметаю його режиї представох „Пиґмалион”, „Лїшка и ґиризда”, „Єрма”, „Ошлєбодзенє Скопля”, „Голгофта”, „Щешлїви Нови 1949.” и велї други, алє и числени дзецински представи, хтори тиж освойовали награди, та младежски, так же бул и барз добри театрално-сценски педаґоґ при котрому починали млади, познєйше искусни ґлумци.

У АРТ/РНТ „Дядя” Пера Уєвич режирал коло 10 замерковани представи, як за старших, так и младежски, у хторих свойо перши векши улоги осемдзешатих рокох прешлого вику витворели теди нашо млади ґлумци Славко Орос, Михайло Зазуляк, Олеся Хрин, Божана Медич, Любомир Дудаш…

РНТ/АРТ „Дядя” му останє подзековни на режиї драмох „Остатня станїца” Ремарка (1976. року), лєбо „Жем” Молини Удовички 1986. року, младежских представох „Гори квартель”, „Бавме ше” и „Писня” у периодзе од 1981. по 1984. рок, познатей комедиї „Сцекай од своєй жени” Рея Куния 1993. року, а остатня представа хтору режирал у РНТ була „Жобрача гора” Дюру Папгаргая у сезони 1995/96. року, по драми спомнутого автора „Наталка на Жобрачей гори”. З тоту представу РНТ участвовал и на Републичним фестивалє аматерских театрох, у його часци у Приєполю.

Петар Уєвич достал Октоберску награду Општини Кула, Награду „Зарї култури” Културно-просвитней заєднїци кулскей општини, Награду „Искри култури” Културно-просвитней заєднїци Войводини, Грамоту Републичного фестивалу, а на одредзени способ му подзековал и терашнї РНТ „Петро Ризнич Дядя”, як нашлїднїк дакедишнього АРТ/РНТ, на шветочносци з нагоди 40-рочнїци снованя РНТ 2011. року.

Най му будзе вична памят!

ПОВЯЗАНИ ТЕКСТИ