ВШЕ ТРЕБА РОБИЦ НА СЕБЕ

автор апа
1.2k Опатрене

Лидия Орза зоз Нового Саду ше 2013. року уписала на докторски студиї на Технолоґийним факултету у Лесковцу, два роки робела як сотруднїк у настави на Технїчним факултету у Зренянину, а тераз роби як модна дизайнерка.

 Лидия од дзецинства була креативна, любела рисовац и интересовала ше за моду. – Мода, шматки, облєчива ме прицаговали одмалючка, анї сом нє була свидома того. Ище як дзецко, на паперу сом рисовала дзивки и шмати за нїх, повистриговала их и бавела ше з нїма – здогадує ше Лидия.Креативносц вше була состойна часц єй живота, цо обачела и єй мац, хтора ю потримовала и помогла же би розвивала тот талант.– Нїґда ме нє нагваряла на дацо, алє ше вше покрадзме припатрала на мнє, сциха ме провадзела и субтилно унапрямовала, же бим розвивала креативносц – припознава вона.После стреднєй школи, Лидия ше рихтала уписац на анґлийски язик, алє, дзекуюци мацери, конкуровала и на Технїчни факултет „Михайло Пупин” у Зренянину, дзе бул напрям дизайн. Нє побановала. – За примаци испит сом ше лєгко порихтала, и прияли ме на буджет. Студиранє ми швидко прешло, лєгко сом покладала испити, ту сом ше цалком прешвечела же тото мой швет, же сом ту дзе треба же бим була и же сом нашла себе – гвари Орзова.

Под час мастер студийох, Лидия Орзова робела у Модней хижи „ТИБ Стил”, дзе одробела приправнїцки стаж. Уписала ше на докторски студиї на Технолоґийним факултету у Лесковцу, а потим конкуровала на место асистента на Технїчним факултету у Зренянину и прияли ю.

– Було напарто путовац зоз Нового Саду до Зренянину, па до Лесковцу. Алє, робота зоз студентами подзековна, нє бануєм, кажде искуство важне, вше треба робиц на себе кед маме нагоду и помагац другим зоз своїм искуством. Успих мож посцигнуц лєм зоз укладаньом до себе – гвари вона и додава:

– Подписала сом контракт на два роки, а после сом ше, заш лєм, одлучела врациц до Модней хижи. Робим як модна дизайнерка, ту практична робота, шицко у моїх рукох и робим тото цо любим.

Лидия прешлого року участвовала на „Serbia Fashion Week”, дзе мала свою першу и успишну самостойну модну колекцию под меном „Park Avenue” за єшень – жиму, а нащивела и тогорочну манифестацию, хтора була того року у априлу.

– Провадзиц тоту манифестацию каждого року и потримуєм колеґох. Вше интересантне видзиц цо других инспирує. То ми мотивация же бим ше розвивала у креативним поглядзе. Гоч „Serbia Fashion Week” млада организация, уж прицагує вельку увагу медийох, як домашнїх, так и зоз иножемства. Так италиянски модни часопис „Vogue” обявел слику мойого модела зоз похвалу: Прекрасни фарби Лидиї Орза. Наисце сом мала вельку чесц – закончує Лидия Орза.

ПОВЯЗАНИ ТЕКСТИ