БЕОҐРАД – Член Одбору за здравє и фамелию Скупштини Сербиї Душан Милисавлєвич поволал вчера Министерство здравя, Лїкарску комору Сербиї, Сербске лїкарске дружтво, институти за явне здравє и медицински факултети же би прешвечели гражданох же вакцинованє важне.
Пре кампаню котра ше на дружтвених мрежох водзи процив вакцинованя, Милисавлєвич гварел же ше гражданом муши дац прави информациї, як и же розуми страх и осторожносц родичох кед чую же єст можлївосци же би даєдно дзецко после вакцинованя достало аутизем.
– Без ясней поруки державних орґанох и фаховних орґанизацийох постої можлївосц за шарлатанство, односно же дзепоєдни людзе збунюю и страша гражданох – гварел Милисавлєвич новинаром.
Вон додал же, после чистей води, вакцини найвецей допринєсли предлуженю и квалитету живота.