НОВИ САД – Новинарска асоцияция Руснацох (НАР) орґанизовала дводньову едукацию за новинарох и редакторох хтори информую по руски, а у сотруднїцтве з Новосадску новинарску школу.
Штварток и пияток, 12. и 13. новембра, на семинаре преподавали професоре з Одсеку за медийни студиї на Филозофским факултету у Новим Садзе и лекторки з руских редакцийох Радия, Телевизиї и НВУ „Руске слово”.
О информованю у кризних ситуацийох преподавал др Владимир Барович, а роботню о крочайох у виглєдовацким новинарстве отримала др Дубравка Валич Неделькович. Новинаре ше активно уключели до бешеди о новинарскей етики з др Деяном Пралицом, а лекторки София Николаєвич и Даниєла Ловас з РТВ накратко винєсли проблеми з хторима ше стретаю у роботи, док Блажена Хома Цветкович з „Руского слова” пририхтала реферат о язику у руских медийох „Язични двоєня”.
Едукация отримана у просторийох Заводу за културу войводянских Руснацох. Проєкт финансовал Покраїнски секретарият за културу и явне информованє, а потримал го и Национални совит рускей националней меншини.
