КОЦУР – У Месней заєднїци (МЗ) у Коцуре, на предкладанє Рафаїла Русковского, вчера отримана схадзка на хторей, попри гражданох, присуствовали предсидатель Општини Вербас др Братислав Кажич и члени Совиту МЗ, а бешедовало ше о рижних темох, найвецей о проблему коцурскей депониї.
Як порадзене, шмециско остава як и дотераз, алє на ньго мож ношиц лєм одпад природного походзеня, хтори сам препада. Одпад ше вивожи на депонию при крижу, шут и будовательни одпад до дзири ґу Савиному Селу, а комунални одпад з валалу одвожи ЯКП „Стандард”.
Предсидатель Општини Вербас др Кажич гварел же ше пробує найсц ришенє и за одвоженє здохлїнох, бо ше и їх руца на депонию. Кед дакому здохнє даяка менша животиня, Явна аґенция за зоогиґиєну и польопривреду (ЯЗИП) однєше ю безплатно, а за векши животинї, як цо статок, наплацує 30 динари по кили, прето же ше их одноши до Зомбора.
Попри о депониї, бешедоване и о каплїчки, финансованю спортских клубох, ровнаню дильовох и ушорйованю валалу, а розпатрани и можлївосци за отверанє експозитури даєдней банки у Коцуре, отверанє народней кухнї и за оправянє драги од римокатолїцкей церкви по преводнїцу.
Поведзене же каплїчка будзе закончена, пенєж уплацени БТП „Бауен”, а предсидатель Општини гварел же шлїдуюцого року будзе закончена и канализация. Кед слово о асфалтованю драги од римокатолїцкей церкви по мост, за тераз у планє виасфалтовац голєм драгу од церкви по улїцу Исе Секицкого, док другу часц нє мож поробиц пре нєзакончену канализацию.
