Дефиле запрагох и културно-уметнїцка програма

автор маф
688 Опатрене

РУСКИ КЕРЕСТУР – Пред шветочним отвераньом тогорочних „Дньох керестурскей паприґи”, у центре валалу отримани дефиле запрагох, хтори орґанизовал домашнї Конїцки клуб „Русин”.

У дефилеу участвовали седем парадни запраги коньох – пейц власнїкох з Керестура и два власнїкох з Коцура, хтори превожели младих и дзеци, членох фолклорних ґрупох Дому култури поприбераних до народного облєчива.

У културно-уметнїцкей часци програми участвовали Младша и Старша дзецинска фолклорна ґрупа Дому култури Руски Керестур, хторих пририхтала хореоґрафка Ґабриєла Саянкович, та Хлопска шпивацка ґрупа, на чолє з руководительом Юлияном Рамачом Чамом.

З нагоди „Дньох керестурскей паприґи” и того року отримани дзецински маскенбал, цали у знаку паприґи, а хтори з дзецми орґанизовали педаґоґ у керестурскей школи Любица Няради и учителька Наталия Зазуляк. Водитель програми бул познати керестурски ґлумец Емил Няради.

На манифестациї було наисце вельо нащивительох, попри домашнїх були и госци з блїзших и дальших местох, котри могли поопатрац и купиц паприґу и другу желєняву, рижни продукти домашнього виробнїцтва, сувенири, напой и друге. Медзи викладачами були и даскельо фирми хтори ше занїмаю з предаваньом нашеня, хемийних средствох и осиґураньом, з котрима сотрудзую керестурски продукователє паприґи.

За нащивительох манифестациї у 16 котлох зготовени традицийни варени єдла, єдзенє з рожню и роштилю, а могло ше и ошвижиц на за тото пририхтаних местох. Присутних всоботу до позних годзинох забавяла керестурска музична ґрупа „Пицикато бенд”, а пияток пред манифестацию домашнї состав „Томас шоу бенд”.

Вецей фотоґрафиї у окремней ґалериї на правим боку нашого сайту.

 2-Prohrama-02

ПОВЯЗАНИ ТЕКСТИ