ШИД – Улїца Нова нєодлуго би ше мала волац др Николи Трумича, Нова 3 – Проти Душана Летича, а Нова 5 ше будзе волац др Драґутина Ґрчича. Часц у населєню Ґ-2, место назви Площа, достанє назву Площа жертвох велькоґоспоїнскей рациї.
Нови назви предложела ґрупа гражданох, а инициятиву же би улїци ношели мена по познатих дакедишнїх согражданох з подписами потримали 110 жителє, як и Совит Месней заєднїци Шид.
На спомнути предлог согласносц дал и Покраїнски секретарият за медзиреґионалне сотруднїцтво и локалну самоуправу, а позитивне думанє дали и Национални совити Руснацох и Словацох, понеже руски и словацки язик службени у Општини Шид.
Пременки назвох улїцох тераз ма потвердзиц Скупштина општини Шид.