БЕОҐРАД – Гражданє Сербиї ше найчастейше чувствую дискриминовани у процесу глєданя роботи, на самей роботи, потим у поступкох пред орґанами явней власци, та у доставаня явних услугох и хаснованю обєктох и поверхносцох – указую податки Поверенїка за защиту ровноправносци Бранкици Янкович. Поверенїца визначела же дискриминация у нашей держави барз заступена, а ище вше нє постоя механїзми за єй санкционованє.
– Податки з виглєдованя „Одношенє гражданох ґу дискриминациї у Сербиї“, хторе окончене концом 2013. року, указую же 65 одсто гражданох дума же дискриминация надосц, лєбо барз присутна у нашей держави, та же у тей обласци треба ище вельо робиц. Глїбоко укоренєни родни, етнїчни и други стереотипи и предрозсудки, та дружтвена дистанца спрам дзепоєдних националних, вирских, сексуалних и других меншинох – гварела Поверенїца.
У Звиту Европскей комисиї о напредованю Републики Сербиї за 2014. рок пише же у Сербиї ище вше найдискриминованши Роми, ЛҐБТ особи, особи котри жию з ХИВ/АИДС-ом.
З того мож заключиц же нєобходне запровадзиц правни рамики за защиту меншинох у обласцох як цо то образованє, хаснованє язика и приступ ґу медийом и вирским службом на язикох меншинох. Ґу тому, потребне ше вецей анґажовац на злєпшаню положеня Ромох, вибеженцох и розселєних особох, гварела Янковичова.