Вше ми интересантне кед у проґнози хвилї бешедую о обєктивним и субєктивним чувствованю температури. Бо, кед цага сиверни витор, обєктивни осем ступнї Целзиюса оставаю у другим плану, бо ци ше видзи же температура далєко спод нули. Подобна ситуация и з обєктивним и субєктивним чувством економскей (нє)моци. Обєктивно, еґзактно и по державней статистики, просекова плаца у Сербиї коло 500 евра у динарскей проциввреносци, алє єй мойо субєктивне дожице голєм дас за 200 евра менше. А субєктивни потреби дас за 300 евра векши. З тей злудзеней позициї на релациї обєктивне/субєктивне пишем тото субєктивне становиско же януар без конкуренциї найдлугши мешац у року. Понеже червени слова швецим по старим календаре, мой януар почина штредком децембра, а закончує ше у перших дньох фебруара. Обєктивно, януар тирва 31 дзень, алє субєктивне чувство же є длуги помедзи 60 и 360 днї, зависно од субєктивного дожица фамелийного буджета. Парадоксално звучи тото цо повем, алє подзековносц за тогорочни януар з велького идзе корони, Ковиду и Кризному штабу хтори забранєл же би ше жимски швета того року швецели як цо то обичай, дзень и ноц, на громади, ронтовно. Миколай, мой родзени дзень тидзень пред Новим роком, Нови рок, дзивчецов родзени дзень штири днї познєйше, Крачун, ище єден Нови рок по старим календаре… того року дочекани, преславени и випровадзени скромнєйше, у домашнїм кругу. Прикладно, и трошок бул прикладнєйши кризним часом. Правда, нє бог зна яка то потїха за празни кишенки бо студня и так висохнута, алє є голєм нє така глїбока же би ше з нєй нє могло висц, як цо то узвичаєна бриґа кед прейду швета.
Медзитим, тото цо нє чека и нє дзба о жимских шветох и торжествох то комунални рахунки, подєднак допити, бездушни и нємилосердни як и кажди други мешац. Як и тото цо ше у домашнїм буджету водзи як „нєплановани” лєбо „позарядово” трошки, а пише голєм з двома нулами у еврох. Наприклад, пукнє вам дентални мост. На столє госцина, а ти анї нє можеш коштовац, анї ци нє до єдзеня кед чуєш од зубарки кельо то будзе коштац. Иншак приємна и пристойна жена, алє нїч то нє значи кед ше дойдзе по фазу пресипованя такого цо нїч по нїм. Но, та, лєм цо сом подумал же того року януар можебуц наисце будзе тирвац лєм 30 и кусур днї, кед воно, як ствари стоя, випатра же ше розцагнє на рок, а можебуц и два, кельо ми по першим рахунку будзе потребне же бим одплацел нови и красши ошмих.
Чи ми вообще будзе до шмиху док ше то закончи? Анї нє такой-таке важне, кед же сом уж ступел до того протетичного подняца, нєт назадок лєм дриляц по конєц. Правда, кед чуєм синтаґму „финансийна конструкция” придзе ми шмишно, алє так якошик, на квашно. Кед слово о мнє, нєт нїякей конструкциї у януару хтори почина у децембру а одцагнє ше до фебруару. То як кед ше цагаш по пустинї, горучава а води маш на двараз лїґнуц. Одразу, опрез тебе оаза. Розбегнєш ше цо скорей ґу хладку и швижей води, а воно – привидзела ци ше фатаморґана. Алє тото похопиш аж кед ши уж злял до себе гевту воду, розгоруцени и вистати од бежаня…
Лєм да ми ше даяк долапиц того фебруара, та гоч то будзе и нарок!