РУСКИ КЕРЕСТУР – На схадзки Орґанизацийного одбору манифестациї Днї керестурскей паприґи, хтора всоботу, 28. марца отримана у Месней заєднїци, утвердзене же тогорочни, штварти Днї керестурскей паприґи буду 15. и 16. авґуста.
Перши дзень Манифестациї знова будзе у центре Керестура, а други, як и дотераз, на Гиподроме „Леї”.
Як порадзене, Днї керестурскей паприґи и того року перши дзень, соботу, почню з нащиву польом под паприґу, пополадню у центре валалу будзе шветочне отверанє з културно-уметнїцку програму, штанди рижних викладачох, як и варенє вецей єдлох у котлох. Роздумує ше же би того року паприґаши и други єдла варели орґанизациї и валаласки подприємства, о чим будзе порадзене познєйше. Програма на Лейох на нєдзелю почнє на 15 г., а як и скорейши роки, атракция буду конїцки обегованя.
Пошвидко будзе видруковани и флаєр за тогорочни Днї керестурскей паприґи пре їх промоцию, а на соботовей схадзки Орґанизацийного одбору присуствовали представителє Здруженя паприґарох, Здруженя женох „Байка”, Конїцкого клубу „Русин”, Месней заєднїци, ЯКП „Руском”, Школи „Петро Кузмяк” и Здруженя ремеселнїкох и приватних поднїмательох.