Мено и презвиско: Сале Яншик

Як ше вола твойо ремесло?

Пчолар.

Зоз чим ше точно занїмаш? Цо шицко продукуєш?

Занїмам ше зоз пчоларством. Чувам пчоли хтори збераю нектар зоз квиткох и зоз нього правя мед. Тиж так, пчоли правя и прополис и полен хтори, исто як и мед, барз здрави.

Треба закончиц даяку школу же биш могол робиц як пчолар?

Нє треба закончиц нїяку школу, алє зато треба любиц пчоли. Можеш научиц о пчолох на интернету, зоз кнїжкох, алє найлєпше би було директно пойсц до особи хтора ма пчоли и видзиц яка то робота.

Цо шицко треба знац кед сцеш буц добри пчолар?

Мушиш знац як пчоли жию, цо им потребне же би були здрави. Треба знац як им помогнуц, защициц их од хоротох и мерковац на нїх през цали рок. Кед их будзеш чувац, вони буду здрави и годни принєсц до кошнїци вельо меду.

Одвше ши сцел робиц праве тоту роботу?

Нє сцел сом одвше буц пчолар. Кед сом бул мали, бал сом ше од пчолох и интересовали ме даяки други ствари. Аж кед сом одроснул, видзел сом же пчоларство барз фина и хасновита робота, и теди сом похопел же тото ремесло за мнє.  

Як випатра твой роботни дзень?

Мой дзень почина так же идзем на пчолнїк и препатрам кажду кошнїцу, же бим видзел чи є здрава, чи єст досц меду. Кед єст меду, вец виберам мед зоз кошнїцох и кладзем го до дунцох, и вец предавам на пияцу.

Цо найкрасше у тей роботи?

У тей роботи найкрасше кед робим у природи, кед виберам мед, кед видзим як таки мали пчолки принєсли тельо вельо меду до кошнїцох.

А цо найчежше?

Найчежше кед пчоли угиню од хороти, од паразитох. Дакеди пчоли угиню и од хемиї хтора ше хаснує за пирсканє овоцох, за суньоґи.

Яка особа треба же би була же би була добри пчолар?

Особа хтора сце буц добри пчолар, муши буц сцерпезлїва, одвичательна. Муши буц порихтана робиц по дижджу, а и по найвекшим слунку.

Мушиш ношиц даяки окремни шмати на роботу?

Препоручлїве ношиц защиту, прето же кажди чловек може буц алерґични кед го уджобнє пчола. Кед идзем на пчолнїк, вше облєкам пчоларски комбинезон.

Цо робиш вжиме кед пчоли шпя?

Кед жима, нєт одпочивку. Теди ше оправя кошнїци, хтори ше будзе хасновац на яр. Складаю ше рамики там дзе пчоли буду ношиц мед. Кед даєдна кошнїца нє ма вельо меду, правя ше цукрово поґачи хтори ше вец дава пчолом же би прежили до яри.

Цо мож научиц од пчолох?

Од пчолох мож вельо койчого научиц. Пчоли нас уча же бизме були вредни, же бизме помагали єдни другим и були як єден тим. Тиж так нас уча же бизме почитовали природу и чували ю.

Чи ше пчоли боя од людзох, чи людзе од пчолох?

Думам же ше людзе баржей боя од пчолох як пчоли од нас, прето же нас можу покусац, а то зна барз болїц. Пчола ше нє бої од людзох, вона их напада теди кед ше сце бранїц.

Цо биш поручел дзецом хтори сцу постац пчоларе док вирошню?

Кед любице природу и пчоли, будзце сцерпезлїви, учце ше од нїх, бо од нїх мож вше дацо нове научиц.