РУСКИ КЕРЕСТУР – У керестурским кафичу „Мала оаза” вовторок отримана презентация роботи за одредзени занїманя у Словениї хтори понука аґенция „Униворк” зоз Словенских конїцох.
У мено аґенциї презентацию отримала Лїляна Костелник з Керестура хтора и сама зоз фамелию жиє и роби у Словениї. Як наглашела, за тераз потребни роботнїки у фахох ЦМЦ оператере, браваре, заварйоваче и електрофахох, з тим же нє пресудна диплома, алє знанє одредзеней роботи и искуство.
Роботну визу у тим месце, як и у околним Целю и Марибору, мож достац на єден рок, з пробну роботу 3 мешаци, обезпечене костиранє у фабрики, по потреби и путованє на роботу, як и змесценє, алє з надополнєньом. Основна плаца за заварйовачох 1200 еври, алє и вецей, бо ше обовязно роби и додатни годзини.
О шицких подробносцох заинтересовани хтори виполнюю потребни условия ше можу явиц Костелниковей, хтора подобну презентацию отримала и у Вербаше.
По єй словох, за тераз аґенция „Униворк” глєда лєм спомнути роботни профили, а годно буц же буду потребни и други ремесла, як хлопски так и женски, понеже єст заинтересованих.