РУСКИ КЕРЕСТУР – На схадзки Управного одбору (УО) Дружтва за руски язик, литературу и културу у преширеним составе всоботу, 4. юлия, у Руским Керестуре Припознанє „Янко Олеяр” додзелєнє матурантки руского оддзелєня керестурскей Ґимназиї Марияни Колошняї, а Припознанє „Славка Сабадош” школярки штвартей класи ОШ Минеи Югас и школярки ґенерациї у ОШ Антониї Монар.
Добитнїцом повинчовала и Ирина Олеяр, супруга покойного учителя и културного роботнїка Янка Олеяра, а тиж и директорка Школи „Петро Кузмяк” Хелена Пашо Павлович, котра подзековала и Дружтву на припознаньох хтори достали школяре тей школи.
На схадзки УО представени и найновши виданя Дружтва – моноґрафия „Подобова колония Стретнуце у Боднарова” и каталоґ „Стретнуца руских школох (1994-2014)”, а бешедоване и о активносцох медзи двома схадзками и програми Дружтва по конєц 2015. року.
