НОВИ САД – Здобуванє титули найлєпшого европского фестивалу, та промоция Нового Саду, допринєсли же би за тогорочного добитнїка Фебруарскей награди Нового Саду бул предложени директор Фестивалу „Еґзит“ Душан Ковачевич. Тоту инициятиву потримали велї институциї и установи з Нового Саду, Войводини, Сербиї, алє и з Чарней Гори, медзитим, конєчне слово маю одборнїки Скупштини Городу Нови Сад.
Фебруарску награду ше додзелює з нагоди Дня Городу – 1. фебруара, як припознанє поєдинцом котри допринєсли медзилюдскей толеранциї, активносцом и дїлом хтори афирмую мено и традицию Нового Саду, а з обласци култури, уметносци, литератури, виглєдованя историї, науково-виглєдовацкей роботи, лєбо ше визначую з анґажованьом у гуманитарней, социялней обласци и здравстве.
Фестивал „Еґзит“ уж други рок за шором преглашени за найлєпши европски фестивал, цо допринєсло и векшей потримовки од держави. Премиєр Сербиї Александар Вучич ше вчера стретнул з представителями „Еґзиту” и поручел же тот фестивал важни за медзинародну репутацию Сербиї, пренєсла РТВ.
– Дзекуєме вам на тим же сце пенєж, котри за Владу нє мали, а за вас є вшелїяк нє достаточни, трошели на розумни способ и помогли Сербиї же би виправела свой имидж у швеце – гварел Вучич з тей нагоди.