НОВИ САД – Пред Вилїю по юлиянским календаре, 5. януара у новосадскей грекокатолїцкей церкви Св. апостолох Петра и Павла отримани остатнї зоз штирох екуменских крачунских концертох з назву „Радуйме ше Христовому народзеню”.
На инициятиву Заводу за културу войводянских Руснацох, а у сотруднїцтве зоз заводами за културу войводянских Словацох и Горватох, та Дружтвом Словенцох, концерти 27. и 28. децембра прешлого року отримани у новосадскей римокатолїцкей церкви Мена Марийового и у церкви Воздвижения святого крижа у Петроварадинє, 4. януара того року у Словацкей Євангелистичней церкви у Новим Садзе, а на концу у нашей новосадскей церкви.
Коляди на вецей язикох на концертох шпивали Хор Дружтва Словенцох „Кредарица”, Хор Горватского КПД „Єлачич”, Хор Словацкей Євангелистичней церкви у Новим Садзе, Камерни хор „Аґапе” Словацкого културного центру „Павел Йожеф Шафарик” з Нового Саду и заєднїцки Хор новосадскей грекокатолїцкей церкви и Руского културного центру „Гармония”, з дириґентку Весну Кесич Крсманович.
Без огляду по хторим календаре преславюю тото найрадоснєйше християнске швето, припаднїки розличних вирских заєднїцох вєдно дзелєли крачунску радосц. У планє же би таки концерти преросли до традициї, а попри представительох националних заєднїцох хтори участвовали на тих перших, превидзене уключованє и других заєдниїцох котри жию у Новим Садзе.
